Un pode ir paseniño polos remansos ou lanzarse no vértigo das fervenzas, cada quén segue e seguirá o seu ritmo vital, pero ten en conta que augas abaixo sempre agarda o mar... Augas abaixo é o blogue de Xermán G. Romai con cousas do cotiá, sociedade, patrimonio, etnografía e natureza, moita natureza...
Cando falaba das ninfas, nese caso de barbantesa, mencionaba o paso a adulto que se producía ó abandonar a coiraza protectora chamada exoesqueleto. Hoxe, como o prometido é débeda, amoso unha foto das coirazas das libeliñas.
Tras pasar baixo a auga das charcas toda a súa etapa coma ninfas, as libeliñas soben un día ás pólas dun salgueiro, e deixan atrás o exoesqueleto para transformarse, vestindo alas e colorido, e saír voando cara as beiras dalgún regato.
Fai uns días en Corrubedo, cando me atopaba facendo fotos de orquídeas atopei unha ninfa de barbantesa (Mantis religiosa) sobre un trovisco (Daphne gnidium) en flor, velaí a podedes ollar na foto superior.
Algunhas especies de insectos, entre elas as libeliñas ou a propia barbantesa, pasan unha etapa da súa vida en estado de ninfas antes de chegar á súa madureza sexual. Algo que non se aprecia na barbantesa agás na falla de ás. As ninfas de libeliña viven na auga, as ninfas de barbantesa na terra, pero o cambio se produce do mesmo xeito, cando tras abandonar unha coiraza protectora chamada exoesqueleto (algo que teñen que facer entre 6 e 9 veces antes de seren adultas) aparecen as ás.
Un día destes poñerei unha foto do exoesqueleto das libeliñas.
Grazas ao voso apoio, Corrubedo fica a salvo da especulación na construción dunha macro-piscifactoría de linguado. Ven de anuncialo hoxe o Presidente da Xunta de Galicia, Emilio Pérez Touriño, tras un encontro en Santiago co representante de Stolt Sea Farm.
Segundo o Presidente da Xunta, pese a que os terreos non se atopan dentro da Rede Natura, a zona de Corrubedo conta cun grande valor “paisaxístico”, polo que se propuxo á compañía norueguesa a localización desta granxa en Porto do Son, na zona coñecida coma Costa Galloufa. Despois deste acordo coa empresa, a Xunta desenvolverá unha figura de protección para Corrubedo, de maneira que esta zona quede excluída do plan sectorial.
Agora quedan no ar varias cousas. Por unha banda, que se materialice o proxecto desta figura de protección. Debendo explicar ós cidadáns en xeral, e ós veciños de Corrubedo en particular, con que tipo de catalogación se vai contar ou que terreos son os que se van a protexer baixo esta figura xurídica. Xa que Corrubedo non é só a súa paisaxe, senón que os seus valores naturais son suficientes por si mesmos coma para gozar dunha figura de protección. Por outra banda, débese explicar qué é o que se vai facer fronte as ameazas que seguen a rodear ó cabo Corrubedo, coma poden ser os verquidos ou a “marbellización” baixo a forma de especulación urbanística.
Dende Natureza Dixital, só nos queda dárvo-las grazas a todos e a todas polo voso apoio.
Podedes baixar o último fondo de escritorio, premendo na imaxe superior ou ben aquí.
Seguimos aportando fondos de escritorio para reivindicar os valores naturais do cabo Corrubedo. Outra das especies incluídas no anexo IV da Directiva Hábitats é esta pequena orquídea, a Spiranthes aestivalis, presente en todo o cabo.
A fotografía foi tomada por Marcos Caruncho (Natureza Dixital e Rosebud 3d) nos campos de Teira (Corrubedo), zona que tampouco está libre da especulación ó quedar fora da Rede Natura 2000.
Dende aquí tamén quero darlle as grazas a todos aqueles que apoian esta iniciativa, especialmente a Manolo, que fixo que moitos blogueiros o sexamos.
Continúa a recolleita de sinaturas en apoio a Corrubedo.
Para baixa-lo fondo de escritorio preme na foto ou aquí.
Continuamos coa recolleita de sinaturas e cos fondos de escritorio en defensa dos valores do cabo de Corrubedo. Agora con unha das especies animais máis representativas deste contorno, o sapo de esporóns.
O anexo IV da Directiva Hábitats recolle aquelas especies animais e vexetais de interese comunitario que requiren unha protección estrita. Entre estas especies se atopa o sapo de esporóns presente en todo o cabo Corrubedo.
Para baixar este segundo fondo preme sobre a imaxe superior ou ben aquí.
A Plataforma Medioambiental de Corrubedo continúa a recoller sinaturas para evita-la construción da macro-piscifactoría de Punta do Corvo. Dende Natureza Dixital comezamos tamén unha campaña en favor do Cabo Corrubedo, a súa riqueza natural e as súas xentes.
A partires do día de hoxe iremos subindo á web, para que ti baixes coma fondo de escritorio (resolución 1024x768), fotografías do que, dende a desvergoña, algúns cualifican de non ser un espazo natural protexido.
A rede natura 2000 estableceuse coma unha ferramenta europea para a conservación da biodiversidade mediante a conservación dos hábitats naturais e as especies que viven neles. Porén, mediante os anexos I e II desta directiva, enuméranse, por un lado os hábitats e por outro as especies de interese comunitario.
O Cabo Corrubedo, así como varias das súas especies (de flora e fauna), quedarían de feito englobadas nesta figura de protección atendendo ó exposto en eses dous anexos. Pero tamén, seguindo as recomendacións do anexo IV (que abrangue os lugares de reprodución e repouso dunha serie de especies) debería estar incluído na rede natura 2000.
Agora moitos dos que non nos explicamos no seu día que o Cabo Corrubedo quedase fora do Complexo Húmido que leva o seu nome, xa temos a resposta: a especulación.
Baixa o teu fondo de escritorio premendo na foto superior ou ben aquí.
O diagnóstico, rotura fibrilar... isto é o que me acontece por pensar que teño 20 anos e andar chimpando polos cantís, de pedra en pedra coma se fose un hirco ou cabuxa do monte.
Onte nos achegamos novamente a Corrubedo para facer unhas cantas fotos máis da zona de punta do Corvo. A miña idea era chegar ate unha praia de bolos que queda entre a praia do Prado e a referida punta, pero o meu camiño rematou facendo a foto que está ó comezo do post: un xuvenil de corvo mariño cristado (Phalacrocorax aristotelis), pousado na punta do Corvo (algo que semella bastante descritivo).
Pois ben, que cando ía facer outra foto máis, cargado co equipo fotográfico ás costas, que debe andar polos 15qg., non se me ocorreu outra cousa que chimpar á pedra que tiña enfronte, a un metro e medio. So oín un cruxido e notei coma o xemelgo estalaba, como a corda dunha guitarra.
Segundo me contou o médico de urxencias teño para unha tempada, pero dentro do malo, poderei darlle un repasiño á páxina web, que estaba un pouquiño abandoada.
PD: por certo, continúa a recolleita de sinaturas para salvar este fermoso lugar.
Animádevos: FirmasOnline.
Estes días atopei un grupo de craveliñas, Dianthus monspessulanus L. ou Dianthus hyssopifolius subsp. monspessulanus (que non me queda moi craro) á beira do Tambre, onde comeza a Devesa de Nimo, da que xa teño falado neste blogue nalgunha ocasión.
Esta planta, escasa en Galiza, xa foi citada por Merino, a principios do século XX na súa obra “Flora descritiva e ilustrada de Galicia” en varios puntos da nosa xeografía, especialmente á beira do Río Ulla. Dende entón, aparte de algún apuntamento de Laínz, e exemplares que se conservan no herbario de Lourizán, apenas existen datos sobre esta fermosa especie nas provincias de A Coruña ou Pontevedra.
A Plataforma Medioambiental de Corrubedo en colaboración con Altermundo.org, comezou hoxe unha campaña de sinaturas en contra da especulación na construción da macropiscifatoría de Punta do Corvo.
A construción desta granxa de linguados, poñería en perigo un dos enclaves naturais máis importantes de Galiza que, agora sabemos porqué, quedou desligado da declaración de Rede Natura 2000 do chamado “Complexo Húmido de Corrubedo”.
Natureza Dixit@l apoia sen condicións esta campaña en contra da instalación da piscifatoría de Punta do Corvo e pide, coma o Pobo de Corrubedo, que a zona sexa declarada espazo natural protexido, dentro do LIC de Corrubedo.
Un Pobo que se uniu na loita contra o Chapapote do Prestige, un Pobo que se manifestou contra as emisións contaminantes dunha fábrica, que denuncia a especulación urbanística, se xunta agora para defender novamente os seus valores ambientais.
Podes lée-lo manifesto da Plataforma Medioambiental de Corrubedo en Natureza Dixit@l.
Podes asina-la campaña na defensa de Corrubedo en FirmasOnline.
Onte apareceu publicado en Galicia Hoxe que houbera unha “reunión secreta” para darlle viabilidade ó proxecto de outra mega-maxi-hiper-granxadelinguado que sería (coma non...) “a máis grande do múndo”. A localización, a que vedes na foto, a beleza da Punta do Corvo, ocupando para iso grande parte do Cabo de Corrubedo. Non bastaba con fábricas contaminantes, chapapote e urbanismo salvaxe, agora queren borrar Corrubedo do mapa para que apareza no lugar onde está o cabo a seguinte lenda “Benvidos a Stolt Sea Farm – Prodemar” ou PODREMAR que lle queda máis ó xeito.
Hoxe dei un paseo polo lugar (agardo que non sexa o derradeiro), para preparar unha reportaxe de Natureza Dixital. Polo que puiden ver e oír, coido que o movemento de resposta social que se achega vai ser moi forte. Os veciños cos que falei están totalmente en contra (a eles non lles poden mentir sobre centos de postos de traballo) e tamén puiden falar con Manoel Santos, o autor do primeiro texto de resposta a este atentado ambiental: Deixade Corrubedo en paz!!
A noticia comeza a espallarse na rede, aí van unha serie de ligazóns sobre o tema:
Manuel Gago, mestre blogueiro, publica “Unha cuestión de diñeiro”
Diario del Gourmet de provincias y del perro gastrónomo escrebe “Desastre”
Algúns artigos publicados en Galicia Hoxe:
“Campaña ecoloxista en defensa de Corrubedo”
“Pregaria desesperada polo cabo Corrubedo”
Algún poderá pensar que estou sendo parcial, e que algún interese me move... pois está no certo, 16 anos vivindo entre o Monte Facho e a Duna, ás portas de Corrubedo, son moitos anos, demasiados para que agora, dende Santiago, non bote en falla os paseos pola Ladeira ou polo cabo, este que a Conselleira de Pesca, algún político de pouca monta e os noruegueses queren facer desaparecer. Se os Noruegueses queren face-la granxa máis grande do mundo, téñeno fácil, que a monten en Noruega, que teñen mar abondo.
Antonio Parada, Tucho para os amigos, é un dos mellores fotógrafos da natureza que hai en Galiza. Mariñeiro de profesión, gasta os seus cartos e o seu tempo libre nesta afición que ambos temos, así coma tamén en colaborar coa CEMMA. Hoxe fun a Corrubedo e por iso o chamei, de tódalas plantas que hai no Parque Natural só lle quedaban por fotografar unhas poucas, entre elas esta orquídea que ten diante do seu obxectivo, a Epipactis palustris, unha xoia botánica que florece nestas datas.
xerman (arroba) naturezadixital.com
